ՀՀ դեսպան Վահրամ Կաժոյանի հանդիպումը ՎՍՀ արտաքին գործերի նախարար Բուի Թան Սոնի հետ:

04 ապրիլի, 2023

Ս․թ․ ապրիլի 4-ին Վիետնամի Սոցիալիստական Հանրապետությունում Հայաստանի Հանրապետության դեսպան Վահրամ Կաժոյանը հանդիպեց ՎՍՀ արտաքին գործերի նախարար Բուի Թան Սոնի հետ։

Հանդիպման ընթացքում կողմերը քննարկեցին Հայաստանի և Վիետնամի միջև հարաբերությունների զարգացումը և խորացումը երկկողմ ու բազմակողմ քաղաքական բնագավառներում, տնտեսական, մշակութային, զբոսաշրջային ու երկուստեք հետաքրքրություն ներկայացնող այլ ոլորտներում: Կողմերն անդրադարձան իրավապայմանագրային դաշտի ընդլայնմանն ու այլ հարցերին, ինչպես նաև մտքեր փոխանակեցին երկու տարածաշրջաններում ներկայումս տիրող իրավիճակների վերաբերյալ։

Հանդիպման ժամանակ դեսպան Կաժոյանն անդրադարձավ Հայաստանի սահմանամերձ շրջաններում, Լեռնային Ղարաբաղում և Լաչինի միջանցքում ստեղծված ներկա իրավիճակին, մարդասիրական աղետալի իրադրությանը, ռազմագերիների և մշակութային հուշարձանների ոչնչացման հարցերին։

Հանդիպման ընթացքում զրուցակիցները պայմանավորվածություններ ձեռք բերեցին խորացնելու Հայաստանի և Վիետնամի միջև հարաբերությունները՝ կազմակերպելով բարձրաստիճան և այլ մակարդակների պաշտոնյաների, լրագրողների և գործարարների փոխադարձ այցեր Հայաստան և Վիետնամ։

ՎՍՀ արտաքին գործերի նախարար Բուի Թհան Սոնի հետ հանդիպմանը հայկական կողմից մասնակցում էր ՀՀ դեսպանության երկրորդ քարտուղար Արամազդ Մուրադյանը, իսկ վիետնամական կողմից՝ ՎՍՀ արտաքին գործերի նախարարության Եվրոպայի վարչության պետի տեղակալ պարոն Հա Հոանգ Հայը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր